Навивачите на Торино збеснаа откако нивната управа се согласи еден од своите најдобри играчи да го продаде во лутиот градски ривал Јувентус.
Бразилскиот централен дефанзивец Бремер минатата сезона беше еден од најдобрите играчи во Калчото на својата позиција. Беше јасно дека после 5 години во „Граната“ ќе мора да си замине во подобар клуб, но навивачите на Торино се надеваа дека тоа нема да биде нивниот најомразен ривал - Јувентус. Токму тоа и се случи.
Интер беше во игра за неговиот потпис, но нивната финансиска понуда беше помала од онаа на Јувентус, па управата на Торино прифати Бремер да остане во градот, но да се пресели во друго маало.
Бремер мораше да ја деактивира опцијата за оставање коментари на својот Instagram профил поради разлутените навивачи на Торино кои не бираа зборови да го изразат својот револт. Потоа, својот гнев го истурија врз профилот на претседателот на клубот, Урбано Каиро, кој се согласи на продажбата.
Денеска се очекува 25-годишниот Бразилец да ги направи медицинските тестови и да стави потпис на договорот со „Старата дама“, договор кој севкупно на Торино ќе му донесе 50 милиони евра.
Не е прв пат играч на Торино да премине во Јувентус. Навивачите на „Граната“ уште не ги заборавиле „предавствата“ на Алдо Серена и Федерико Балѕарети, па јасно е дека Бремер повеќе нема да има мирен живот низ улиците на Торино.
