Најавените предлози на Европската комисија против зголемувањето на цените на енергијата ќе имаат за цел да ја ограничат цената на гасот што Русија го испраќа во Европа преку цевководи и ќе вклучува помагање на производителите на електрична енергија кои се борат со ликвидноста, рече претседателката на ЕК Урсула фон дер Лајен.
Брисел подготвува мерки за заштита на граѓаните и индустријата од постојано зголемување на цените на гасот и електричната енергија кои предизвикуваат економски потреси во Европската Унија. Фон дер Лајен твитна дека предлозите ќе имаат за цел да ја ограничат цената на рускиот гас што се испраќа преку цевководи, да ја ограничат побарувачката за електрична енергија и да ги користат приходите на енергетските компании за да им помогнат на ранливите потрошувачи и бизниси.
Италијанскиот премиер Марио Драги предложи претходно земјите-членки на ЕУ да се договорат за ограничување на цената на гасот што го увезуваат од Русија. Некои земји-членки не се склони да го сторат тоа, бидејќи Русија може целосно да го запре протокот на гас во Европа како одмазда, велат дипломатите. Францускиот претседател Емануел Макрон рече дека ќе го поддржи таквиот предлог.
Цените на бензинот во Европа скокнаа во понеделникот откако Газпром објави дека Северен поток 1 ќе остане затворен поради дефект.
Европа ја обвинува Русија дека користи енергија како оружје поради западните санкции што и се наметнати поради нејзината инвазија на Украина. Газпром тврди дека намалувањата и прекините на протокот на гас се резултат на западните санкции и технички проблеми.
„Путин ја користи енергијата како оружје со тоа што го намалува снабдувањето и манипулира со нашите енергетски пазари. Тоа нема да успее. Европа ќе победи“, рече Фон дер Лајен.
Комисијата планира помош и за производителите на електрична енергија кои имаат проблеми со ликвидноста, рече таа.
Комисијата ќе разговара за своите првични идеи со претставниците на земјите-членки на ЕУ во среда, пред итниот состанок на министрите за енергетика во петок, на кој ќе се разгледаат различните опции. Фон дер Лајен ќе ги претстави предлозите на ЕУ во говор на 14 септември.