Во северниот дел на американската сојузна држава Калифорнија од понеделникот горат десетици пожари предизвикани од големиот топлотен бран и силните ветришта.
Поради пожарите што се поделени во три зони, издадена е наредба за евакуација на жителите во одредени подражја, што опфаќа илјадници луѓе. Гувернерот на Калифорнија, Гавин Њусам, прогласи вонредна состојба на територијата на целата сојузна држава.
За време на гаснењето на пожар во првата зона, централна Калифорнија, во пад на хеликоптер загина пилотот на леталото. Хеликоптерот Bel UH-1H бил на мисија во близина на градот Коалинг кога се срушил.
Областа Санта Клара е втората зона зафатена од пожари, каде беснеат 20 пожари во кои се повредени најмалку двајца пожарникари.
Третата зона го опфаќа подрачјето на Сан Матео и Сан Круз, каде има пет активни пожари во чие гаснење се вклучени околу 600 пожарникари и седум хеликоптери. Повредени се три лица ангажирани во првичното справување со стихијата.
Поради пожарите дојде до дефекти и прекини на снабдувањето со електрична енергија во некои делови, додека во одредени области струјата беше намерно исклучена за да се спречи ширење на пожарот.