Принцезата од Велс, Кејт Мидлтон, е во болница по успешната операција на абдоменот, соопшти денеска Кенсингтонската палата.
Портпаролот изјави попладнево: „Нејзиното кралско височество, принцезата од Велс, вчера беше примена на клиника во Лондон за планирана операција на абдоменот“.
„Операцијата беше успешна и се очекува принцезата да остане во болница десет до четиринаесет дена, пред да се врати дома за да продолжи со опоравувањето. Врз основа на сегашните медицински совети, малку е веројатно дека ќе се врати на јавните обврски пред Велигден“, рече тој.
Изјавата беше објавена и на официјалните профили на кралската двојка на социјалните мрежи и понатаму се вели: „Принцезата од Велс го цени интересот што ќе го предизвика оваа изјава. Таа се надева дека јавноста ќе ја разбере нејзината желба да одржи што е можно повеќе нормалност за неа децата, како и нејзината желба нејзините лични медицински податоци да останат приватни“.
„Затоа, Кенсингтонската палата ќе обезбедува ажурирања за напредокот на Нејзиното кралско височество само кога ќе има нови значајни информации за споделување“, се додава.
На крајот, беше забележано дека принцезата од Велс би сакала да им се извини на сите загрижени поради фактот што мора да ги одложи своите претстојни ангажмани и дека со нетрпение очекува да се врати што е можно поскоро.
