Луис Хамилтон ги обвини шефовите на Формула 1 дека ги ставаат парите на прво место и ги повика да ги вратат на накиснатите навивачи кои присуствуваа на вчерашната трка за Големата награда на Белгија.
Седумкратниот светски првак Луис Хамилтон беше револтиран откако се извозеа само задолжителните два круга потребни да се прекине трката, откако гледачите речиси четири часа беа на дожд.
Немаше тркање, туку возачите беа придружувани од безбедносните возила осум минути. На Хамилтон на крај му беше доделено третото место, а победи неговиот ривал за титулата Макс Верстапен.
„Ова беше фарса и единствени кои изгубија беа навивачите кои платија огромни пари за да не гледаат како се тркаме. Нормално дека не можете да направите ништо во врска со времето, но имаме софистицирана опрема која може да ни каже што се случува и беше јасно дека времето нема да попушти. Не испратија од една и само една причина. Два круга позади безбедносниот автомобил нема смисла. Требаше да прекинеме и да им ги вратиме парите на навивачите кои се срцето на спортот”, кажа Хамилтон.
На трибините присуствуваа 75.000 гледачи, кои за ова платија од 124 до 589 евра. Многумина си заминаа и пред трката која започна повеќе од три часа по предвидениот почеток.
