Џордан Хендерсон смета дека неснаодливоста во завршницата на нападите го чинела Ливерпул победа во синоќешното Мерсисајд дерби со Евертон.
Ливерпул ја испушти првата шанса да дојде на чекор до математички заверување на титулата. Му беше потребна победа на гостувањето кај градскиот ривал Евертон, но натпреварот заврши без голови.
„Мислам дека можеме да бидеме далеку подобри, нормално. Сепак, знаеме дека синоќа имаше и некои позитивни работи. Се обидовме да се адаптираме на ситуацијата, но генерално очигледно е дека сме разочарани бидејќи нашата намера беше да дојдеме тука и да ги земеме трите бода. Позитивно е што не примивме гол и одлично се браневме. Она што ни фалеше беше снаодливост во завршницата од нападите“, вели играчот од средниот ред.
Хендерсон одигра 90 минути против „Карамелите“ во натпревар на кој неговиот тим настапи без ѕвездата во офанзивата, охамед Салах.
Ливерпул веќе в среда ќе има нова шанса за победа откако на „Енфилд“ ќе гостува незгодниот Кристал Палас.
„Секој натпревар во Премиер лигата е тешок, како и секој тим. Сега на ред ни доаѓа Кристал Палас, екипа која одигра солидно во саботата, па и тој натпревар ќе биде тежок. Едноставно мора да одиграме нјадобро што можеме и да пробаме да победиме колку што е можно повеќе натпревари“.