Позицијата на Херта на табелата во Бундеслигата не е најголемиот проблем за челниците на клубот. Клубот од Берлин се бори за опстанок, но и доколку го изборат што изгледа малку веројатно, се соочуваат со уште поголем проблем - од финансиска природа.
Според германските медиуми, проблем е лиценцата за следната сезона, па лесно може да се случи да бидат префрлени во четвртата лига од германската фудбалска пирамида.
Од клубот уверуваат дека нивниот нов спонзор, американската компанија 777 Partners, треба да ги реши сите финансиски проблеми.
„Ние сме во постојан контакт со германската фудбалска лига во врска со процесот на лиценца и партнерството со нашиот инвеститор 777 Partners. Мора да се разговара и да се разјаснат двете теми и да се исполнат сите законски барања, особено правилото 50+1. Нема да коментираме повеќе за ситуацијата околу процесот и шпекулациите што се појавија во медиумите“, соопштија од берлинскиот клуб.
Извори блиски до Лигата за германските медиуми изјавиле дека „процесот е многу критичен“ и дека тоа е „најлошиот случај што некогаш го имале“ кога станува збор за лиценцирањето.
Главното прашање е дали партнерството на Херта со американската компанија го прекршува правилото 50+1 кое го регулира влијанието на финансиерите во германскиот професионален фудбал.
Клубот е во голем проблем бидејќи без 100 милиони евра, колку што е финансиската инјекција на 777 Partners, нема да може да обезбеди лиценца за следната сезона.
777 Partners има малцински акции во Севиља и Мелбурн Виктори, а е сопственик на ББЛ (Британската кошаркарска лига) и на тимот Лондон Лајонс. Сопственик е и на нискобуџетните авиокомпании Flair Airlines во Канада и Bonza во Австралија.
На три кола до крајот тимот од Берлин е последен во Бундеслигата со 25 бодови, три помалку од Бохум и Штутгарт кои се израмнети на местото кое води во баражот, и 5 помалку од Шалке 04 кој е на последното место кое гарантира опстанок.