Севернокорејскиот лидер Ким Џонг Ун и неговото семејство во изминативе неколку недели се вакцинирале со кинеска експериментална вакцина против коронавирус, изјави американски аналитичар повикувајќи се на два неименувани извори од јапонското разузнавање.
Хари Казианис, експерт за Северна Кореја во истражувачкиот Центар за национални интереси во Вашингтон, рече дека покрај семејството Ким, кинеската вакцина ја примиле и неколку високи севернокорејски функционери.
Не е познато која фармацевтска компанија му ја доставила вакцината на севернокорејскиот лидер или дали е докажано безбедна, додаде Казианис.
„Во изминатите две или три недели, Ким Џонг Ун и голем број други високи функционери во семејството Ким и властите биле вакцинирани против коронавирус благодарение на вакцината што ја разви кинеската Влада“, напиша Казианис во написот за порталот 19FortyFive.
Тој додаде дека најмалку три кинески компании работат на развој на вакцина против COVID-19, вклучително и Sinovac Biotech, CanSino Biologics и Sinopharm Group.
Sinopharm соопшти дека нивната вакцина веќе ја примиле скоро милион луѓе во Кина, иако не е познато дека некоја од трите компании ја почнала третата фаза на клинички испитувања на нивните експериментални вакцини за коронавирус.
