Северна Кореја неодамна воведе нов закон со кој сака да запре какво било странско влијание, строго казнувајќи ги сите оние кои кај себе имаат странски филмови, странска облека или ако зборуваат на сленг, пренесе BBC.
Замислете да живеете во земја без интернет, без социјални медиуми и со само неколку ТВ-канали коишто се под строг надзор на државата – тоа е животот во Северна Кореја. Сега, лидерот на таа земја одлучи да оди чекор понатаму па воведе закон со кој тргна во војна против странските филмови, сленгот, фармерките и други работи од странско потекло, пишува BBC.
Секој којшто ќе биде фатен со видео содржина од Јужна Кореја, САД или Јапонија го чека смртна казна, а на оние кои гледаат такви снимки им се заканува затвор од 15 години.
Неодамна, Џонг Ун напиша порака преку државните медиуми во кои ја повика Лигата на младите да преземе мери против индивидуалистичкото, антисоцијално однесување меѓу младите. Сега сака да ја запре употребата на странски изрази, фризури и облека за кои смета дека се „опасни отрови“.
Политичките аналитичари сметаат дека севернокорејскиот лидер се обидува да ги запре надворешните информации кои доаѓаат до народот на Северна Кореја бидејќи животот во земјата станува сè потежок.
По затворањето на границите поради пандемијата, земјата е отсечена од надворешниот свет од кога било претходно.
Скоро во целост е запрена трговијата со соседна Кина.