Цените на нафтата паднаа до близу 95 долари на меѓународните пазари поради разочарувачките податоци за фабричката активност во Кина и стравувањата дека построгите мерки за запирање на ширењето на COVID-19 ќе го попречат закрепнувањето на побарувачката.
На лондонската берза цената на барелот по пладне беше за 69 центи пониска во однос на затворањето на тргувањето на крајот на минатата недела и изнесуваше 95,08 долари. На американскиот пазар барелот се тргуваше по пониска цена за 84 центи, од 87,06 долари.
Трговците на почетокот на неделата беа загрижени од податоците за падот на активноста во кинеската индустрија во октомври, според официјалното истражување објавено денеска, поради намалената глобална побарувачка и строгите мерки за борба против COVID-19.
Кина е најголемиот увозник на нафта во светот
„Кога станува збор за пазарите на нафта, падот на индексот на менаџери за набавка (PMI) го следеше постконгресниот блуз во Кина. Не е тешко да се поврзе послабиот PMI со кинеската политика на нулта толеранција кон Ковид“, рече Стивен Инес од SPI Asset Management.
„Сè додека тоа се спроведува решително, трговците кои шпекулираат за зголемување на цените ќе бидат во дефанзива“, додаде Инес.
Кинеските градови ги заоструваат ограничувањата за коронавирусот, намалувајќи ги надежите дека побарувачката ќе закрепне.
Увозот на кинеска сирова нафта падна за 4,3 отсто во периодот од јануари до септември, за прв пат од 2014 година, а можеби и подолго.
Еврозоната, од друга страна, најверојатно ќе влезе во рецесија, со најголем пад на деловната активност во октомври во речиси две години, покажува истражувањето на S&P Global. Зголемените трошоци за живот ги прават потрошувачите претпазливи и ја повредуваат побарувачката.
Европската централна банка планира повторно да ги зголеми клучните каматни стапки во исто време, дури и ако тоа ја турне еврозоната во рецесија и го поттикне политичкото незадоволство.
Во понеделникот Организацијата на земјите извознички на нафта (ОПЕК) ги зголеми прогнозите за среднорочна и долгорочна побарувачка на нафта и процени дека за задоволување на побарувачката потребни се 12,1 милијарди долари инвестиции, и покрај енергетската транзиција.
Нафтениот картел денеска не соопшти колку чинел во петокот барел кошничка нафта на нејзините членови. Во четвртокот таа изнесуваше 94,73 долари.
