Македонскиот репрезентативец Аријан Адеми конечно ќе го напушти загрепски Динамо и ќе стане нов играч на кинески Бејџин Гуоан, велат вестите кои стигнуваат од Ориентот.
Кинескиот новинар Лиу Шианју тврди дека се решени и последните несогласувања околу финансиите на релација играч-клуб.
„Клупското раководство последниве денови работеше прекувремено. Гуоан изминативе година дена решаваше стари проблеми, вклучувајќи заостанати плати и спорови како надомест за раскинување на договори со странски играчи“.
„На Гуоан му беше забрането да носи нови играчи. Сега кога проблемот е решен, забраната повеќе ја нема. Освен Соуза, чие доаѓање е потврдено, стигнува и 32-годишниот (на 29 мај ќе полни 32, заб. на прев.) капитен на Динамо од Загреб. Наскоро тој ќе стане нов играч за врска на Гуоан“, информира Лиу.
Адеми му се приклчучи на Динамо во 2010 година кога дојде од редовите на Шибеник. Оттогаш одигра 358 натпревари на кои постигна 30 голови и запиша 41 асистенција. Се споменува отштета од 1 милион евра, пари кои треба да легнат на сметката на Динамо.
Изминативе години секој преоден рок се споменуваа разни дестинации за Адеми, од Премиер лигата, Серија А и Ла Лига, до Блискиот Исток, но тој остана во Динамо, дали поради финансиски малите понуди или малата отштета, не се знае.
За македонската репрезентација Адеми има одиграно 28 натпревари и постигнато 4 голови. Беше дел и од тимот кој настапи на ЕУРО 2020.
Бејџин Гуоан е клуб од главниот град Пекинг. Лани сезоната ја заврши на 7. место на најдобрата кинеска лига, од 18 екипи.