Кличко до граѓаните на Киев: Не одете во центарот на градот 

Градоначалникот на Киев, Виталиј Кличко, вели дека по нападот со дронови избил пожар во станбена зграда во главниот град. Кличко наведува дека лекари и пожарникари се на местото на настанот.

Сè уште нема информации за жртви. Кличко на Telegram објави и предупредување до граѓаните и им наложи да останат во засолништа. 

„Уште две експлозии во областа Шевченков. Останете во засолништа“, напиша Кличко.

„Во центарот на главниот град сообраќајот е блокиран на делови од неколку улици. Апелирам до жителите на Киев: не одете во центарот на градот освен ако не е апсолутно неопходно“, вели тој.

Да потсетиме, утринава се случија нови експлозии во Киев. Експлозиите се случија околу 7 часот по локално време, а се огласија и сирените за воздушен напад.

Една од експлозиите се слушнала во близина на центарот на градот.