Виталиј Кличко, градоначалник на Киев и поранешен светски шампион во бокс во тешка категорија, не сакаше конкретно да каже дали ќе го предизвика украинскиот претседател Володимир Зеленски на претседателските избори следната година.
„Кога земјата е во војна, кога голем дел од земјата е окупиран, кога десет милиони луѓе се надвор од земјата, политички натпревар би можело да биде фатален за нашата земја“, рече тој денеска во интервју за германска новинска агенција.
„Сега е време да се брани земјата“, рече Кличко, кој е градоначалник од 2014 година. „Денес се работи за опстанокот на Украина, а не за тоа кој владее со земјата. Нашите граѓани плаќаат огромна цена за ова“, рече тој пред првата годишнина од руската инвазија.
„Потребно е обединување на сите политички сили, на сите политички партии“, смета тој. „Ние стоиме под едно знаме - сино и жолто, нашето украинско знаме. За жал, ова не го разбираат сите, дури и овде во Украина. Приоритет е одбраната. Земјата мора да биде независна и суверена. Земјата мора да стане демократска“, рече тој.
„Јас си ја работам својата работа. Подготвен сум. Моето рамо е секогаш подготвено за секој патриот, секој бранител“, додаде тој.
На прашањето зошто не стои рамо до рамо со Зеленски, кој со 170 сантиметри е за повеќе од 30 сантиметри понизок од Кличко, кој е висок 201 сантиметар, поранешниот боксер рече: „Рамо до рамо, нема да може, поради различните висини... Само се шегувам“.
Тој рече дека во моментов не размислува да го предизвика Зеленски, но дека ако ѝ треба на земјата, тогаш нема друг избор.