Бројот на бебиња родени во Јапонија минатата година падна осма година по ред.
Стапката на наталитет е многу ниска, покажуваат владините бројки, а висок функционер им рекол на Јапонците дека е клучно земјата да го смени трендот во следните шест години.
Минатата година во Јапонија се родиле 758.631 бебе, што е пад од 5,1 отсто во однос на 2022 година, според јапонското Министерство за здравство и благосостојба. Бројката го означува најмалиот број раѓања откако Јапонија почна да ги води овие статистики во 1899 година, пишува The Guardian.
Минатата година во Јапонија се склучени 489.281 брак, што е намалување за 5,9 отсто во однос на претходната година. Тоа значи дека бројот на бракови падна под половина милион за прв пат по 90 години. Токму тоа е една од клучните причини за падот на бројот на раѓања. Да се има дете вонбрачно е многу ретко во Јапонија поради семејните вредности засновани на патерналистички традиции.
Анкетите покажуваат дека многу помлади Јапонци се противат на брак или создавање семејство. Причините се наоѓаат во работните места, високите трошоци за живот кои растат побрзо од платите и корпорациите кои претпочитаат да вработуваат луѓе без деца. Многу млади родители во Јапонија тврдат дека се чувствуваат изолирано.
Главниот секретар на кабинетот Јошимаса Хајаши вчера изјави за новинарите дека континуираниот пад на стапката на наталитет е во „критична состојба“.
„Во следните шест години ќе можеме да го смениме негативниот тренд и ова е последна шанса. Нема време за губење“, рече Хајаши.
Премиерот Фумио Кишида го нарече нискиот наталитет „најголемата криза со која се соочува Јапонија“ и најави пакет мерки кои вклучуваат поголема поддршка и субвенции главно за раѓања, деца и нивните семејства, пишува The Guardian.
Но, експертите велат дека се сомневаат дали напорите на владата ќе бидат ефективни бидејќи досега тие најмногу се фокусирале на луѓе кои се веќе во брак или планираат да имаат деца, додека не се однесуваат соодветно на растечката популација на млади луѓе кои не сакаат да се омажат и имаат деца.
Во текот на изминатите 50 години, бројот на раѓања во Јапонија опаѓа. Пред 50 години, Јапонија имаше 2,1 милиони раѓања. Намалувањето на годишните раѓања дојде порано од претходните прогнози според кои Јапонија ќе има под 760.000 раѓања годишно дури во 2035 година.
Јапонското население од повеќе од 125 милиони се предвидува да се намали за околу 30 отсто на 87 милиони до 2070 година. Намалувањето и стареењето на населението има големи импликации за економијата и националната безбедност бидејќи земјата се обидува да ја зајакне својата војска за да се спротивстави на се помоќните територијални амбиции на Кина.
