Секој ден сè повеќе светски ѕвезди одат во Саудиска Арабија, каде потпишуваат баснословни договори со локални клубови кои не штедат трошоци за да ги привлечат врвните имиња на светскиот фудбал.
Една од ѕвездите кои летово заминаа во Арабија е Сенегалецот Калиду Кулибали. Поранешниот стопер на Наполи и на Челси потпиша за Ал Хилал каде ќе заработува 20 милиони евра годишно.
Сенегалецот откри три клучни причини зошто ја напуштил Европа на 33 години.
„Пари. Се разбира, не можам да го негирам тоа. Ќе можам да му помогнам на целото мое семејство да живее добро, од родители до роднини. Исто така, работам на неколку проекти во Сенегал и ќе бидат потребни пари. Почнавме да градиме клиника во селото на моите родители. Во планот имам многу проекти за млади“, изјави Сенегалецот, додавајќи уште една причина.
„Вера. Јас сум муслиман и доаѓам во идеална земја за мене и моето семејство“, рече тој и ја наведе и третата причина:
„Не бев задоволен од ситуацијата во Челси. Не сакам да седам на клупа и да не правам ништо. Повеќе сакам да одам таму каде што навистина ме сакаат“.