Поминаа цели четири месеци откако Роналд Куман беше отпуштен од функцијата тренер на фудбалерите на Барселона.
Потоа не излегуваше често во јавноста, а неговата страна на приказната за тоа како и зошто е раскинат договорот, односно за сè што се случуваше во клубот остана нераскажана до крајот. Сега тој откри некои детали.
Куман на клупата го замени Чави, клупска легенда и еден од најсилните медиумски кандидати за оваа позиција. Неговото доаѓање изненади малкумина, но холандскиот стручњак изненади затоа што, како што признава, претседателот на клубот Жоан Лапорта го уверил дека Чави нема искуство за таа работа.
„Нема да ме видите на Камп Ноу извесно време, не можам да одам таму. Не можам да се преправам со Лапорта дека ништо не се случило“, рече Куман и објасни: „Не ми дадоа време како што му дадоа на Чави. Сè уште ми е болна тема. Работев со многу повредени играчи, сега кога Педри се врати во форма, сега кога Осман Дембеле е тука... Сега можете да видите сè“.
Зошто Меси мораше да замине?
„Не бев тренер на Лапорта, го имав тоа чувство од првиот момент, не кликнавме. Ми недостигаше поддршка од врвот, имав чувство дека Лапорта сака да се ослободи од мене бидејќи јас не сум негов избор. На секој тренер му треба време и трпение на водечки луѓе. Посакувам да го имав тоа. Лапорта ми кажа илјада пати дека Чави нема да биде тренер на Барселона затоа што му недостига искуство“, додаде Куман коментирајќи го заминувањето на Меси во ПСЖ.
„На инсистирање на управата, се согласив на заминување на некои играчи, поради финансии. Но кога ќе видите дека носат некого за 55 милиони евра набрзо откако го ослободија Лионел Меси, се прашувате дали се случува нешто друго. Зошто Меси мораше да замине?“