Леброн Џејмс е спортска легенда, но на многумина не им е омилен, а потегот што го направи откако цел стадион го исвирка на Супербоул само ќе стави масло на огнот.
Без обѕир на тоа што минатата недела Леброн Џејмс страна најдобриот стрелец во историјата на НБА лигата, и натаму голем број навивачи во САД не го сакаат. Еден од најдобрите кошаркари на сите времиња на многумина им е трн в око бидејќи се обидува да го надмине на сите омилениот Мајкл Џордан, понекогаш и премногу се истакнува себеси во преден план (неодамна со себе носеше коза, јасна алузија на GOAT трката), па така сега со исвиркување беше пречекан на најголемиот спектакл на годината во САД.
Леброн се појави на Супербоулот одигран ноќеска на „Стејт Фарм“ стадионот во Глендејл, Аризона помеѓу Канзас Сити Чифс и Филаделфија Иглс. Кога беше прикажан на големиот екран навивачите почнаа да свиркаат, што беше тотално различна реакција за разлика од останатите ѕвезди кои се појавија во ВИП ложата.
И покрај тоа што Леброн не наиде на позитивна реакција од публиката, знаеше како да се снајде во дадениот момент. Им одговори така што се правеше дека си става круна на главата, поради својот прекар Кинг (Крал), по што свирежите само се зголемија. Поголемиот дел од 65-илјадната публика на тој начин покажа што мисли за Леброн - по сѐ изгледа најнеомилената ѕвезда во САД.
Супербоул се играше во Аризона и веројатно поголемиот дел од навивачите се приврзаници на Феникс Санс, кој е ривал на Лос Анџелес Лејкерс, но секако е чудно да се види како една голема ѕвезда и еден од најдобрите спортисти на сите времиња е вака масовно исвиркан.
