Ол-стар викендот во Солт Лејк Сити и официјално започна ноќеска со натпреварот на ѕвездите во подем, односно играчите кои се прва или втора сезона во НБА лигата и оние кои играат во развојната Џи лига.
Четири екипи беа предводени од поранешните НБА играчи Пау Гасол, Џоаким Ноа, Џејсон Тери и Дерон Вилијамс.
Во првото полуфинале Тим Гасол го победи Тим Дерон со 40:25, а со 13 поени доминираше играчот на Њу Орлеанс Пеликанс, Хосе Алварадо. Меѓу поразените, најзабележителен беше Треј Марфи III, кој ја воодушеви публиката со одлично забивање.
Тим Џоаким беше подобар од Тим Џејсон во второто полуфинале со 40:32 благодарение на одличната игра на Квентин Грајмс.
За разлика од полуфиналето, финалето се играше до 25, а повторно доминираше Алварадо, кој погоди одлична тројка во серијата при резултат 22:20 за Тим Гасол. Воедно и си ја обезбеди и МВП титулата.
Да потсетиме, ноќта меѓу сабота и недела е закажан натпреварот скил челинџ, по што следува натпревар во брзо шутирање тројки и натпревар во забивање.
Ден подоцна го имаме централниот настан во кој Тим Леброн ќе игра против Тим Јанис.
