Откако викендов се одигра четвртфиналните натпревари, познати се учесниците во полуфиналето од најстарото клупско натпреварување на светот кои ќе се борат за пласман во 140-тото финале.
Лестер синоќа го исфрли Манчестер Јунајтед уништувајќи уште една шанса тимот на Оле Гунар Солскјер да се бори за трофеј сезонава. „Лисиците“ беа убедливи и со 3:1 го заверија полуфиналното место.
Келечи Ихеаначо во 24. минута донесе водство, но 14 минути подцна „Црвените ѓаволи“ се вратија во игра со погодокот на Мејсон Гринвуд.
Седум минути по паузата Јури Тилеманс беше оставен да се прошета пред шестнаесетникот на гостите, па со прецизен удар донесе водство од 2:1, а во 78. минута Ихеаначо со својот втор гол го завери пласманот.
Лестер досега никогаш го нема освоено ФА купот, а 4 пати губел во финалето во кое не играл од далечната 1969 година.
Челси очекувано славеше над Шефилд Јунајтед, тим кој е последен во Премиер лигата. Сепак, не беше лесно како што ес очекуваше. Во 24. минута требаше Оливер Норвуд да ја затресе сопствената мрежа за Челси да поведе, а конечните 2:0 ги постави Хаким Зијеш во судиското надополнување.
Челси ќе го брка своето 15-то финале, а до финалето стигна и лани кога загуби од Арсенал и не го освои својот 9-ти трофеј.
Во саботата Манчестер Сити со 2:0 како гостин славеше кај Евертон на Карло Анчелоти. Победникот беше решен пред самиот крај. Прво Илкај Ѓундоан во 84. минута донесе водство кое го запечати Кевин Де Брујне во последната минута.
„Граѓаните“ се борат за 12-тото финале, а последен пат таму беа во 2019 кога и го кренаа пехарот, вкупно шести.
Последниот полуфиналист е тимот на Саутемптон кој со 3:0 како гостин го исфрли Борнмут, единствениот преостанат второлигаш. Головите ги постигнаа Муса Џенепо и двапати Нејтан Редмонт за тимот на да се бори за своето петто финале каде последен пат беше во 2003 кога загуби. Саутемптон има еден ФА куп пехар, оној од 1976 година.
Полуфиналните натпревари се закажани за 17 април, а се среќаваат:
Лестер - Саутемптон
Челси - Манчестер Сити
Финалето треба да се игра на 15 мај на „Вембли“ во Лондон. Бранителот Арсенал беше усфрлен уште во 4. коло.
