Претседателите на девет земји од НАТО објавија заедничка изјава во која ја поддржуваат кандидатурата на Украина за членство во алијансата и ги повикаа сите членки да ја зголемат воената помош за Киев.
Претседателите на Чешка, Естонија, Летонија, Литванија, Северна Македонија, Црна Гора, Полска, Словачка и Романија изразија цврста поддршка за одлуката на самитот на НАТО во Букурешт за идното членство на Украина во Алијансата.
„Ја поддржуваме Украина во нејзината одбрана од руската инвазија, бараме Русија веднаш да се повлече од сите окупирани територии и ги охрабруваме сите сојузници значително да ја зголемат својата воена помош за Украина“, се додава во соопштението.
Во соопштението се наведува дека лидерите на тие земји, кои сочинуваат речиси една третина од членките на НАТО, „го посетиле Киев за време на војната и со свои очи биле сведоци на последиците од руската агресија“.
„Ја повторуваме нашата поддршка за суверенитетот и територијалниот интегритет на Украина. Ние не ги признаваме и никогаш нема да ги признаеме руските обиди за анексија на која било украинска територија“, се вели во соопштението.
Во соопштението, исто така, се бара „сите оние кои вршат злосторства на агресија“ да бидат изведени пред лицето на правдата.