Дрога е запленета завчера на црногорскиот граничен премин Сукобин во автомобил со регистерски таблички од Северна Македонија, кој се движел од правец на Албанија кон Црна Гора.
Дрогата е пронајдена во полициско возило, а како што соопшти царинската служба на Црна Гора службеници на царинска испостава во Сукобин во координација со полициската управа, заплениле дрога и спречиле шверц при контрола на автомобил со регистарски таблички од Северна Македонија. Автомобилот се движел од правецот на Албанија кон Црна Гора.
„Службеници во царинската испостава Сукобин, во координација со Полициската управа, при контрола на патничкото моторно возило, пронашле поголема количина на растителна материја за која постои основано сомнение дека се работи за наркотици. Возилото со регистарски таблички на Република Северна Македонија се движело од правец од Албанија кон Црна Гора, а супстанцата, спакувана во неколку поединечни пакувања, била пронајдена во скриен бункер на возило наменето за криумчарење“, се наведува во соопштението.
Во согласност со протоколот за билатерална соработка, понатамошната постапка ја презела надлежната институција на Република Албанија.
Дел под медиумите во земјава вчера јавија дека дрога е пронајдена во службено возило на МВР на албанско-црногорската граница и оти станува збор за марихуана, а во возилото биле вработени во Секторот за компјутерски криминал и дигитална форензика, кои заминале на обука во Црна Гора и тоа со службеното возило од авто паркот на МВР.
Возилото, МВР го користело откако го добило од Агенцијата за одземен имот, а истото било запленето од Царинската управа во 2016 година во акција за сузбивање на трговија со дрога. Според дел од медиумите, двајцата вработени во МВР немаат поврзаност со дрогата и не знаеле за неа.
Од МВР го потврдија случајот, но тврдат дека станува збор за претходно запленета марихуана која останала во возилото, скриена во бункер под седиштата. Од министерството додаваат дека двајцата службеници веќе се вратени во Скопје.
Според објаснувањето на МВР двајцата вработени во Секторот за компјутерски криминал и дигитална форензика за патувањето во Црна Гора задолжиле службено возило „Chraysler Voyager“ од автопаркот на министерството. Возилото било предадено во нивно владение од страна на Агенцијата за управување со одземен имот, откако претходно Царинската управа во 2016 година го запленила во акција за сузбивање на трговија со дрога, објави telma.com.mk.