Италијанскиот селектор упати низа пофални зборови за Шпанија која синоќа ги импресионираше сите со својата игра.
„Шпанија одигра одличен натпревар, доминираше со топката. Нам ни се искомплицира кога требаше да играме со 10 играчи... Против Шпанија и онака тешко се игра, не па со десетмина“, рече Роберто Манчини во изјава за Marca.
Синоќа во полуфиналето од Лигата на нации Шпанија со 2:1 славеше во Милано против европскиот шампион Италија. Шпанците одиграа одличен натпревар во кој не ѝ дозволија на Италија да покаже зошто е континентален шампион, а воедно и ѝ го нанесоа првиот пораз после 37 натпревари и прв на стадионот „Џузепе Меаца“ воопшто.
„Знаевме дека порано или подоцна ќе загубиме натпревар. Подобро што тоа се случи сега отколку на финале од ЕУРО или Мундијал“, додаде Манчини.
Тој беше и импресониран од младиот Гави кој со само 17 години не само што стана најмнал шпански репрезентативец, туку и одигра небаре е искусен репрезентативец.
„Со своите 17 години Гави е одличен фудбалер, многу е добар. Шпанија има големи таленти генерација по генерација. Шпанија има многу среќа што има такви играчи“, заврши селекторот на „Аѕурите“.