Легендарниот фудбалер Диего Марадона излезе од болница и е префрлен „на приватна локација каде ќе се лечи од зависноста од алкохол“.
Психологот на Марадона претходно изјави дека Аргентинецот е во стабилна состојба во приватна клиника каде се опоравува од операцијата на главата. Марадона беше опериран минатата недела затоа што имал субдурален хематом или акумулација на крв помеѓу мембраната и мозокот.
Неговиот невролог Леополдо Луке изјави дека проблемот е веројатно предизвикан од незгода, а Марадона (60) рекол дека не се сеќава како дошло до тоа.
Психологот на Марадона, Диего Дијаз, кој се грижеше за него во приватната клиника Оливос, изјави вчера дека на легендарниот фудбалер му се потребни лекари, терапија и „голема поддршка од неговото семејство“.
Тој изјави дека статусот на национален спортски херој не го спречува Марадона да ги добие истите здравствени проблеми како и другите.
„Во одредени работи, Диего Марадона е како и секој друг... Со истите ограничувања, тешкотии и предности што ги има секое човечко суштество. Сега најважно е тој да биде стабилен, да се контролира во однос на фармаколошките проблеми и нивоата на исхрана и одмор“, рече Дијаз.
„Потоа ќе може да се продолжи со системот за пациенти како Диего Марадона. Мора да биде во присуство на терапевти, медицински сестри, лекари и што е најважно, неговото семејство“, додаде тој.
Д-р Луке за Radio Red изјави дека Марадона ќе биде префрлен „на приватна локација“ во близина на Буенос Аирес, во близина на неговите ќерки Далма и Џанина, што значи дека засега ќе паузира со менаџерската работа.
„Тој е пациент кој живее во екстреми“, рече Луке, додавајќи дека Марадона мора да го запре стресот што е штетен за неговото здравје.
Сепак, фудбалската легенда неодамна изјави дека сака да продолжи да работи.
Луке рече дека Марадона, кој претходно се лечеше од зависност од дрога, го намалил внесот на алкохол, но дека дури и мали количини може да имаат негативен ефект во комбинација со лековите што му се потребни за закрепнување.
Марадона беше примен во болницата во Ла Плата на 2 ноември поради анемија, дехидрираност и знаци на депресија, а деталните прегледи открија крварење во мозокот, а на 4 ноември беше итно опериран.
