Светски познатиот синџир за брза храна McDonald's стана цел на критики на интернет откако некои купувачи од Австралија забележале дека големината на сендвичите значително се намалила.
Откако почнаа масовните поскапувања, многу брендови за храна решија „тајно“ да ја зголемат цената, а да го намалат количеството и големината на своите производи, со што продаваат помалку за повеќе пари. Дебатата за McDonald's почна кога Австралиец спореди еден Filet-O-Fish, McChicken и обичен хамбургер.
Потоа се јавуваа и други купувачи кои се согласија дека понудените хамбургери сега се „значително помали“. Од раководстовото на McDonald's се огласија и изјавија дека нема промени во големината на прехранбените производи.
„Ние сме посветени на нашите купувачи да им обезбедиме хамбургери со одличен квалитет и одлична вредност, кои содржат 100% пилешко одобрено од РСПЦА и 100% австралиско говедско месо“, се вели во соопштението.
Ова не е првпат познатиот синџир за храна да биде обвинет за намалување на големината на своите хамбургери низ годините. Во 2020 година, незадоволен клиент фотографирал чизбургер за којшто рече дека е едвај поголем од неговиот палец… McDonald's тогаш призна дека ги променил своите лепчиња за чизбургери како дел новитетите и новите вложувања.