Меган Маркл и британскиот принц Хари станаа родители на девојче кое го доби името Лилибет „Лили“ Дијана Маунтбатен Виндзор.
Второто дете на парот е родено во петокот во болница во Санта Барбара, Калифорнија пренесе Reuters. Мајката и бебето се во добра состојба.
„На четврти јуни бевме благословени со пристигнувањето на нашата ќерка Лили. Таа е многу повеќе од тоа што можевме да го замислиме и сме благодарни на љубовта и молитвите коишто ги почувствуваме ширум светот“, наведоа Хари и Меган во соопштение. „Ви благодариме на вашата континуирана љубезност и поддршка во текот на ова посебно време за нашето семејство“, истакнаа тие.
Лилибет е прекарот на кралицата Елизабета, а средното име Дијана е избрано во чест на покојната мајка на принцот Хари.
Меган и Хари се венчаа во 2018 година и го имаат синот Арчи роден во мај, 2019 година. Веста за бременоста парот ја соопшти во февруари, а во текот на скандалозното интервју во март со Опра пред јавноста откри дека очекуваат ќерка. Тогаш Хари и Меган, меѓу другото, изјавија дека ги напуштиле кралските должности за да го заштитат семејството.