Поранешната германска канцеларка Ангела Меркел, која на почетокот на декември ја напушти функцијата по 16 години власт, ја одби понудата од генерален секретар на ОН, Антонио Гутереш, да работи во ОН, соопштија денеска од нејзиниот кабинет.
Меркел на 8 декември дефинитивно ја напушти политичката сцена и се посвети на пишување политички мемоари, велат оттаму.
Меркел минатата недела му се јавила на генералниот секретар на ОН, му се заблагодарила за понудата и му кажала дека нема да ја прифати.
Во соопштението не е прецизирано каков ангажман ѝ понудил Гутереш на поранешната германска канцеларка, но медиумите претходно јавија дека станува збор за претседавање со Советодавниот комитет на ОН за глобални јавни добра, што е еден од неговите водечки реформски проекти.
Меркел, која долго време најавуваше пензионирање по германските парламентарни избори во септември 2021 година во неколку наврати повтори дека не сака да преземе никаква нова функција по истекот на нејзиниот мандат.
Откако дефинитивно ја напушти политичката сцена на 8 декември, таа се посвети на пишување политички мемоари со нејзината поранешна советничка и блиска соработничка Беате Бауман.
-Нејзината цел е да ги објасни главните политички одлуки што ги донела за време на нејзините 16 години минати на власт, рече нејзиниот советник.