Фудбалерите на Милан синоќа беа елиминирани во четвртфиналето од Копа Италија по скандалозната судиска одлука во последните моменти од натпреварот против Аталанта.
Милан поведе со 1:0 кога мрежата на Аталанта ја затресе Рафаел Леау, но на паузата се замина со 1:1 бидејќи беше 2. минута од надополнувањето Теун Копмејнерс постигна гол за израмнување.
Во 59-тата минута Копмејнерс по вторпат го матираше Мајк Мењан и донесе предност за Аталанта, која сонува за вредниот пехар уште од далечната 1961 година кога последен пат го освои. Оттогаш неуспешни обиди имаше во 1987, 1996, 2019 и 2021 кога губеше во финале.
Во 5. минута од суидиското надополнување на вториот дел Милан ја доби последната шанса за израмнување, но потоа во преден план влезе судијата Марко Ди Бело.
„Росонерите“ имаа корнер, а и голманот Мењан дојде во шеснаесетникот на Аталанта.
Топката падна право врз главата на Јан-Карло Симиќ, кој шутираше, а Емил Холм ја одвои раката од телото и го сопре неговиот удар.
Судијата Ди Бело не свирна пенал, а неговите колеги во ВАР собата не ја поништија неговата одлука, па Милан беше елиминиран од Копа Италија, а Аталанта во полуфиналето ќе игра против ланскиот финалист Фиорентина.