Властите во италијанскиот град Милано предложија нов закон со кој се забранува продажба на сладолед по полноќ, со цел да се заштити мирот на жителите.
За многу Италијанци, сладоледот доцна навечер е дел од културата, но тоа сега е доведено во прашање со новиот закон предложен од градските власти. Доколку се усвои законот, продажбата на сладолед по полноќ ќе биде забранета веќе во мај.
Предлог-законот, кој опфаќа 12 области, ќе ја забрани и продажбата на брза храна „за носење“, вклучително и пица и пијалоци по полноќ за да се намали бројот на бучни групи на улиците на Милано, кои не им дозволуваат на останатите да спијат.
Заменик-градоначалникот Марко Гранели рече дека целта е да се постигне баланс меѓу дружење и забава и мир и одмор за жителите.
Забраната би важела од 00:30 часот во работните денови и од 1:30 часот за време на викендите и празниците.
Граѓаните имаат право до почетокот на мај да се жалат или да предложат измени на законот, пишува Sky News.
