Селекторот на македонската фудбалска репрезентација најави дека на утрешната пријателска во Струмица шанса да го покажат својот потенцијал ќе им даде на фудбалерите кои досега не добија многу можност да играат во квалификациите.
Попладнево во Струмица селекторот Благоја Милевски одржа прес-конференција по повод утрешната пријателска.
„За натпреварот против Ерменија ќе им дадеме шанса на фудбалерите во составот кои треба да го потврдат потенцијалот во репрезентацијата. После исцрпувачкиот дуел во Прага ќе видиме колку фудбалерите чувствуваат физички замор. Нема повредени и пред натпреварот ќе одлучиме кој ќе започне“, најави Милевски.
Тоа е добра одлука на селекторот, бидејќи пријателските натпревари служат токму за тоа, да се проверат сите повикани кои претходно не добиле, или добиле многу малку шанса, да покажат дали заслужуваат повик.
„Контролниот дуел против Ерменија, која е квалитетна селекција и одигра одлични квалификации, е одлична можност за сите нас да го провериме потенцијалот со кој располагаме. Шанса ќе добијат сите, но ќе одлучиме за минутажата на фудбалерите“.
Такви играчи се: третиот голман Игор Алексовски, кој сѐ уште нема настапено на официјален натпревар (бранеше против Саудиска Арабија лани, но тој натпревар беше ФИФА неофицијален), потоа латералните бекови Ахмед Иљазовски и Тодор Тодороски, играчот од средината Исник Алими, креативецот Давид Бабунски, како и напаѓачите Димитар Митровски, Ердон Даци и Ваљон Етеми.
„Оваа селекција секогаш оди на победа, така ќе биде и утре против Ерменија“, заврши селекторот.
Бидејќи во квалификациската група има непарен број на репрезентации, секое коло една е слободна. Во ова коло тоа е нашата Македонија, па слободниот термин ќе се искористи за пријателска против Ерменија закажана за утре (вторник) од 15:00 часот на стадионот „Благој Истатов“ во Струмицца.
Билетите по цена од 200 денари се во продажба во градот под Беласица и тоа во салата „Парк“, ЛитератураМК и Т.А. „Сафари“.
Инаку, ова ќе биде дури 13-та пресметка помеѓу двете репрезентации. Ерменија е противник со кој Македонија има одиграно најмногу пати во историјата. Засега билансот е 5 наши победи, 4 за Ерменците и 3 нерешени, а гол-разликата 20:17 е во наша корист.