Проектот наречен Mareterra - Monaco sur mer (Маретера - Монако на море), кој ќе додаде уште 6 хектари на градот-држава Монако на Медитеранот, ќе биде завршен за една година, 8 месеци пред договорениот рок, соопшти синоќа компанијата Anse du Portier, промотор на проектот вреден 2 милијарди евра.
Малото кнежевство со вкупна површина од 2,03 км² и население од 39.000 веќе се прошири за 40 хектари кон морето во 50-тите, но последниот проект започнат во 2015 година е неспоредлив, дури и кога се споредува со зградите на Блискиот Исток, благодарение на строгите сеизмички и еколошки прописи, а исто така и поради длабочината.
Идниот луксузен кварт ќе се гради буквално „на море“, поточно на подводен насип длабок 50 метри. Се наоѓа веднаш до Грималди форумот, конгресниот центар во Монако и вклучува 5 згради, вкупно 130 станбени единици и 10 вили.
Луксузниот станбен комплекс го дизајнираа италијанскиот архитект Ренцо Пјано и компанијата Vallode et Pistre. Досега се продадени речиси сите станбени единици. AFP пишува дека цената на квадрат во Монако може да биде и до 120.000 евра.
Допрва треба да се доизградат градините кои ќе се раззеленуваат, а населбата ќе има шеталиште покрај море, мало пристаниште и парк достапен за секого. „Маретера е исклучително достигнување за Монако“, рече Ги-Тома Леви-Сусан, директор на Anse du Portier.
„Затоа, можам да кажам дека морето е нов терен за освојување, но не смееме да го уништиме“, рече тој и додаде дека се надева дека со овој проект ќе може да покаже „дека тоа е можно“ и дека ќе се унапредат „размислувањата и добрите практики во овој домен“.
Леви-Сусан посочува дека во новоизградената станбена зона, која ќе се наоѓа помеѓу два подводни природни резервати, на карпи и вештачки гребени се пресоздадени нови живеалишта за флората и фауната.
Не е првпат Монако да се шири кон морето за да ја зголеми својата мала територија. Тоа го има направено и претходно во неколку наврати.