Собранието во саботата го усвои Законот за финансиска поддршка на ранливата категорија граѓани според кој, граѓаните со низок доход ќе добијат еднократна финансиска поддршка од 6.000 денари по лице.
Помошта е дел од Владината програма П1-Мерки за справување со коронакризата и е наменета за купување македонски производи и услуги.
Меѓу оние кои ќе добијат еднократна помош во висина од 6.000 денари се 5.726 самохрани родители, 182.271 пензионер со пензии до 15.000 денари, 85.108 невработени кои се пасивни баратели на работа, самостојните уметници, филмски работници, културни работници и естрадни уметници чија бројка е 520 корисници. Опфатени се и оние граѓани кои се над 64 години, а немаат пензија, ниту државна социјална пензија и се со приходи пониски од 15.000 денари, или воопшто немаат приходи. Со тоа, оваа мерка опфаќа на 283.000 наши граѓани, а нејзината вредност изнесува 27,6 милиони евра.
„Финансиската поддршка ќе се распределува преку банка во коjа физичкото лице има постоечка трансакциска сметка и која во рок од пет дена од денот на влегување во сила на овој закон потпишала договор со Владата. Конечната листа на корисници на финансиска поддршка со податок за име и презиме на корисникот и банката во која ја поседува трансакциската сметка, Генералниот секретаријат на Владата на Република Северна Македонија ја објавува на www.kupuvamdomasno.gov.mk, во рок од осум дена од денот на влегување во сила на овој закон, а за самохраните родители на кои статусот го утврдува центарот за социјална работа, во рок од дваесет дена од денот на влегување во сила на овој закон“, објави SDK.mk.
