Руската полиција вчера уапси 1.496 приврзаници на осудениот опозициски лидер Алексеј Навални, кои протестираа за негово ослободување.
Илјадници демонстранти вчера се собраа во центарот на Москва, на покана од соработниците на Навални, чија здравствена состојба е многу лоша, бидејќи тој штрајкува со глад повеќе од три недели.
Дел од демонстрантите се приведувани уште пред почетокот на протестите. Најголем број се уапсени во Санкт Петербург, околу 600 лица.
Според полицијата, во Москва протестирале околу 6.000 луѓе, додека според организаторот имало 60.000 луѓе.
Протестите се одржаа на денот на годишното обраќање на рускиот претседател Владимир Путин до нацијата.
Тој во своето обраќање ги обвини странските влади дека се обидуваат да ја наметнат нивната волја на Русија. Путин никогаш не го споменува јавно името на Навални.
Навални (44) штрајкува со глад повеќе од три недели во знак на протест поради тоа што затворските власти не му дозволуваат да биде прегледан од приватен лекар.
