Светот „гледа во очи на ураган од петта категорија“, изјави во Давос генералниот секретар на ОН, Антонио Гутереш.
Во својот говор пред светските лидери на Светскиот економски форум, генералниот секретар на ОН оцени дека „светот е во жалосна состојба“.
„Нашиот свет е зафатен од совршена бура на повеќе фронтови“, рече тој.
Меѓу главните закани со кои се соочува светот, тој ги посочи претстојната глобална рецесија, војната во Украина, растечките нееднаквости, зголемувањето на трошоците за живот, високата задолженост на ранливите земји и последиците од пандемијата.
Гутереш рече дека во борбата против глобалното затоплување „ја губиме битката“ и дека секоја нова недела носи „нов климатски ужас“.
Ветувањето да се ограничи порастот на глобалната температура на 1,5 степени Целзиусови над прединдустриските нивоа „отиде во неповрат“, рече тој, предупредувајќи дека светот се движи кон пораст од 2,8 степени.