Американскиот претседател Џо Бајден вчера вети дека ќе се спротивстави на авторитаризмот на Кина и Русија и најави дека ќе го прекине пристапот што неговиот претходник Доналд Трамп го имаше кон Москва.
САД мора „да се соочат со напредувањето на авторитаризмот, особено со растечките амбиции на Кина и намерите на Русија да ја ослабне нашата демократија“, рече американскиот претседател во говорот за време на неговата прва посета на Стејт департментот.
„Му објаснив на претседателот Путин, на многу поинаков начин од мојот претходник, дека помина времето кога Соединетите Американски Држави се покоруваа на агресивните потези на Русија“, додаде тој.
Тој ја нарече Кина најсериозен ривал, но истакна дека САД ќе соработуваат со Пекинг кога тоа е во американски интерес.
„Ќе се спротивставиме на кинеското кршење на економските правила, човековите права, интелектуалната сопственост и потрагата по глобално влијание“, рече тој.
„Но, ние сме подготвени да работиме со Пекинг, кога тоа е во интерес на Америка.“
Бајден повика на крај на војната во Јемен и најави крај на „поддршката“ за продажбата на оружје од САД на воената коалиција предводена од Саудиска Арабија во таа земја.
„Ги засилуваме дипломатските напори за ставање крај на војната во Јемен, војна што предизвика хуманитарна и стратешка катастрофа“, рече тој. „Таа војна мора да престане“, нагласи тој.
„За да ја потенцираме нашата решителност, ние ја прекинуваме целата поддршка на САД за офанзивните операции во војната во Јемен, вклучително и продажбата на оружје“, додаде тој.
Бајден исто така ги повика генералите на Мјанмар, кои ја соборија цивилната влада на Аунг Сан Су Ќи, „безусловно да се откажат од власта“.
„Војската на Мјанмар мора да се откаже од преземената моќ“, рече Бајден неколку часа откако Белата куќа објави дека разгледува „насочени санкции“ против воените претставници кои го извршија пучот.
Претседателот Бајден објави дека има намера да го удвои бројот на бегалци што САД ќе ги примат во однос на нивното историски најниско ниво наметнато од Доналд Трамп на крајот на неговиот мандат.
Во согласност со предизборното ветување, новиот претседател на САД одреди годишна квота од 125.000 бегалци кои ќе можат да дојдат во САД како дел од програмата за раселување, во споредба со 15.000 за тековната буџетска година.
