Стратегот на Баерн верува дека неговиот најдобар играч одлично би се снашол и во друг спорт, поточно како примач во американски фудбал.
Роберт Левандовски е најдобриот голгетер на Стариот континент за минатата 2020/21 година. И сезонава почна во ист ритам, повторно ќе доминира во Бундеслигата, а како стојат работите, и во Европа.
Неговиот тренер, младиот стратег Јулиан Нагелсман, е толку импресиониран од Полјакот што верува дека со неговите квалитети дури би бил одличен и во сосема друг спорт и тоа во американски фудбал, односно познатата НФЛ.
„Би бил одличен примач. Брз е и физички силен. Во Црвената зона би бил вистинскиот човек за примање на кратки пасови и потоа да направи тачдаун“, тврди Нагелсман за клупскиот официјален канал BayernTV.
Стратегот говореше и за неговата импресионираност од деталните подготовки кои ги прават НФЛ тренерите, каде играчите треба на памет да научат и над 500 различни потези во една сезона.
„Кога еден тренер има такви планови, наредниот ден се наоѓа на насловните страници. Тоа не е нормално, но мислам дека е совршенство да се обидуваш да се подготвиш за секоја ситуација“, вели тој.
Досега неколкумина европски фудбалери, меѓу кои Хари Кејн и Кристиан Фухс, имаат изразено желба некогаш да се пробаат како кикери во НФЛ, користејќи ги своите фудбалски познавања за да донесат екстра поени при тачдаун.
