Вечерва покрај Аталанта историја испишува и Лајпциг кој има предност од Лондон, а сега игра и пред својата публика.
„Секој од нас вечерва ќе одигра до своите крајни можности. Никој нема шанса често да игра против Спарс во осминафинале од Лигата на шампиони и притоа да е со шанса да мине во четвртфиналето“, вели стратегот на домаќините.
Јулиан Нагелсман уште пред првиот натпревар изјави дека Жозе Мурињо е негов идол. Успеа да го победи среде Лондон, а сега има убава можност и да го елиминира со оглед на тоа што португалскиот стратег е оној кој мора да брка негатива, а повторно ќе биде без главните напаѓачи Хари Кејн и Сон Хјон-мин.
„Не мислам многу на тоа какво ќе биде чувството да се елиминира Мурињо. Мислам на тоа колку убаво ќе биде да се исфрли Тотенхем. Како што кажав и претходно, јас не сум на исто ниво со Мурињо. Не сум сигурен дека во кариерата ќе успеам да освојам толку трофеи колку што има тој“, вели скромниот Нагелсман.
Неговиот Лајпциг важи за тим со добра одбрана на чие чело е унгарскиот голман Петер Гулачи.
„Секогаш е важно да се има добар голман. Кога два добри тима играат еден против друг тоа значи дека ќе има малку шанси за гол. Јас сум среќен што го имам Петер Гулачи, но и не сум среќен што Тотенхем го има Иго Лорис бидејќи тој е одличен голман“, рече 32-годишниот Германец.
Кај Лајпциг неизвесен е настапот на голгетерот Тимо Вернер, за кој Нагелсман вели дека сепак многу е веројатно дека ќе може да игра.
„Тимо завчера тренираше нормално. Ако сѐ оди по план, ќе стартува вечерва“, заврши Јулиан.