Најстарата жителка на Европа и најстара жена во светот, калуѓерката Андре, се опорави од COVID-19 и оваа недела ќе го прослави својот 117-ти роденден.
Лусил Рандон, која го добила името сестра Андре кога се приклучила на католичкиот хуманитарен ред во 1944 година, живее во центарот за геронтологија во Тулон на југот на Франција.
Тестот на 16 јануари покажа дека е позитивна на коронавирус, по што се изолираше од другите штитеници во домот, но не покажа никакви симптоми, пренесува Reuters.
На прашањето од телевизијата BFM дали е исплашена, таа одговори: "Не, не се плашев затоа што не се плашам да умрам. Среќна сум што сум со вас, но би сакала да бидам на друго место, да му се придружам на брат ми, моите баби и дедовци“.
Портпаролот на домот за стари лица во Сент Кетрин Лабур, Давид Тавела, изјави дека Андре се чувствува добро.
„Сметаме дека е излечена. Таа е спокојна и со нетрпение очекува да го прослави својот 117-ти роденден во четврток“, рече тој.
Тој исто така рече дека сестрата Андре, која е слепа, но полна со дух, ќе го прослави својот роденден со мала група штитеници во домот, поради ризик од инфекција. „Таа е многу среќна“, додаде тој.
Сестра Андре, родена на 11 февруари 1904 година, е втора најстара жива личност во светот. Најстариот е Јапонецот Кане Танака, кој на 2 јануари наполни 118 години. Дваесетте најстари живи луѓе во светот се жени.