НАТО распореди резервни војници во својата мисија КФОР на Косово, соопшти денеска еден од командантите на мисијата, во пресрет на крајниот рок за воведување на регистарските таблички што го воведоа косовските власти, на што се противат локалните Срби.
Претходните обиди да се воведат регистерски таблички на северот на Косово со мнозинско српско население доведоа до судири меѓу полицијата и Србите кои поставија блокади на патиштата летово.
Тие беа отстранети кога мировниците на НАТО се вклучија во следењето на процесот, а косовските власти го продолжија рокот до 31 октомври. Како што се приближува тој датум, се зголемуваат стравувањата од конфликт меѓу Косово и Србија, повеќе од 20 години откако НАТО ја бомбардира Србија за да го запре насилството врз албанското мнозинство на Косово.
„Како дел од нормалното планирање на распоредувањето на силите, има резерви обучени да дојдат овде“, им рече на новинарите во кампот Бондстил командантот на источниот сектор на КФОР, полковник Кристофер Самулски.
Околу 3.700 мировници на НАТО моментално се распоредени во поранешната српска покраина за да спречат насилство меѓу етничките Албанци и Србите. Американскиот офицер не прецизираше колку дополнителни војници пристигнале во Косово, но спомна единица „со големина на баталјон“. Еден баталјон обично се состои од 500 до 1.000 војници.
