Поранешниот аргентински фудбалски репрезентативец демантираше дека се враќа на зелениот терен и истакна дека не планира да тренира со Индепендиенте, пренесуваат тамошните медиуми.
Серхио Агуеро (35) ја заврши играчката кариера во декември 2021 година поради проблеми со срцето. Неодамна изјави дека добил порака од неговиот кардиолог дека во иднина би можел повторно да заигра фудбал.
Одредени светски медиуми објавија дека Агуеро наводно добил покана од тренерот на Индепендиенте и негов поранешен соиграч, Карлос Тевес, да тренира со овој аргентински великан.
„Тоа е лага - нема да тренирам со Индепендиенте. Понекогаш луѓето измислуваат работи, бидејќи мојот кардиолог штотуку се појави... Ми рече дека сум многу добро, дека е важно да сум во добра здравствена состојба, но треба да поминам уште многу тестови за да се вратам на тренинзите на идеално ниво“, изјави Агуеро.
Агуеро својата кариера ја започна токму во Индепендиенте, а потоа играше за мадридски Атлетико и Манчестер Сити, а кариерата непланирано ја заврши како првотимец на Барселона.
За репрезентацијата на Аргентина одигра 101 натпревар и постигна 41 гол, со што е трет на вечната листа на стрелци кај популарните „Албиселесте“. Беше дел од Мундијалите 2010, 2014 и 2018, а веројатно ќе играше и во Катар 2022 доколку не го затекнаа проблемите со срцето.
Нормално, на Х не изостанаа и досетливите твитови...
