Група загрижени граѓани и граѓанки, револтирани од повторното затајување на институциите, неспремноста и некомпетентноста на полицијата и немањето вистинска волја да ја завршат својата заштитничка и превентивна функција кога станува збор за на жртвите на родово базирано насилство, сексуален напад и вознемирување, најавија протест пред Министерството за внатрешни работи.
Протестот е закажан за в петок, 17 февруари, во 15 часот пред Министерството за внатрешни работи.
„Случајот кој во медиумите стана познат како ‘дивиот таксист кој ѝ избега на полицијата’ по илјадити пат укажа на истите недостатоци на институционална поддршка на жртвите кои пријавуваат родово базирано насилство.
Во изминатиот период имаме пораст на случаи на родово-базирано насилство: таксисти кои напаѓаат девојки, партнери кои ги претепуваат и пукаат во своите девојки, сексуално уценување на 14-годишно девојче од страна на повеќе мажи, а листата секојдневно се надополнува.
Ова е резултат на повеќе аспекти од нашето општество длабоко вкоренети во системската неедаквост и нормализирањето на насилството како дел од културата“, велат организаторите на протестот.
Нивните барања се:
-санкции за нестручните полициски службеници кои ги изложуваат жртвите на дополнително вознемирување.
- обучени полициски службеници кои ќе си ја вршат работата за која се платени.
- секоја пријава да биде третирана со максимална професионалност, но и да биде дочекана со емпатија, солидарност и поддршка.
- да бидеме безбедни во своите градови, улици и живеалишта.
Организаторите ги повикуваат сите граѓани кои сакаат да ја искажете својата поддршка кон жртвите на родово базираното насилство да им се придружат пред МВР во 15 часот.
Повеќе информации може да најдете на ОВОЈ ЛИНК.
