Нобеловата награда за физика често зазема централно место меѓу наградите, бидејќи се доделува на откритија кои го преобликувале начинот на кој го гледаме светот, а досега им била доделена на многу познати научници како Алберт Ајнштајн, Макс Планк и Пјер и Марија Кири.
Научниците Ален Аспект, Џон Клаузер и Антон Цајлингер ја добија Нобеловата награда за физика за 2022 година за нивниот пробив во квантната механика за однесувањето на субатомските честички, отворајќи ја вратата за работа на суперкомпјутери и во областа на шифрирана комуникација.
Кралската шведска академија на науките соопшти дека тројцата лауреати, францускиот научник Аспект, американскиот научник Клаузер и австрискиот научник Цајлингер, овозможиле продолжување на основните истражувања и го отвориле патот за нова практична технологија.
„Сега имаме големо поле на истражување кое вклучува квантни компјутери, квантни мрежи и безбедна квантно шифрирана комуникација“, се вели во соопштението.
Наградата, стара повеќе од еден век и вредна 10 милиони шведски круни, ја доделува Кралската шведска академија на науките.
Нобеловата награда за физика е втора што ја доделува Академијата оваа недела, откако шведскиот генетичар Сванте Паабо во понеделникот ја доби наградата за физиологија или медицина.
Следат и соопштенијата за Нобеловите награди за хемија, литература, мир и економија.
