Малала Јусафзаи, младата активистка за правата на децата и најмлад добитник на Нобеловата награда за мир од Пакистан, ја краси насловната страница на британскиот Vogue, за кој во интервјуто говори за својот живот, наградите што ги доби и за нејзината работа.
Малала неодамна дипломираше на Универзитетот во Оксфорд на 23 години, а со само 17 години стана најмладиот добитник на Нобелова награда за мир.
Родена е во Пакистан и како млада девојка се судри со Талибанците борејќи се да им се овозможи и на девојчињата да се образуваат.
На 10 октомври 2012 година Талибанците ја застрелаа во главата и вратот, но и таа успеа да преживее. Поради својата неверојатна сила, волја и желба за промена, Малала стана позната низ целиот свет и е пример за многу девојки и млади жени кои во неа најдоа инспирација на патот кон своите цели.
Преку својата работа, Малала се спријатели со други млади активисти како што се Грета Тунберг и застапничката за контрола на вооружувањето, Ема Гонсалес.
Профилот на оваа млада жена, која ќе се појави во јулското издание на Vogue, ќе вклучува почит кон нејзиниот лик и дело од некои од најважните луѓе, вклучувајќи ја и поранешната прва дама на САД, Мишел Обама, која Малала ја нарече „навистина извонредна“ и извршниот директор Тим Кук кој за Vogue изјави дека „не ја разбира одличноста што ја поседува“.
Специјално за Vogue Малала беше фотографирана од Ник Најт и тоа облечена во светлоцрвен фустан дизајниран од Стела МекКартни, како и со марама во истата боја. За другите фотографии, таа го смени стајлингот, па беше фотографирана и на страниците на списанието во црвена комбинација, но во панталони и кошула на дизајнерката Габриел Херст, кои беа во комбинација со контрастен син шал.