Дали ви треба телефон за најосновните секојдневни задачи? Nokia C12 можеби е вистинскиот избор за вас.
HMD Global, домот на телефоните Nokia, го лансираше својот најнов паметен телефон - Nokia C12 - наследник на моделот Nokia C10 од 2021 година.
Новиот уред, покрај препознатливиот дизајн на Nokia, има и куќиште направено од пластика, покриено со текстура за крајниот корисник да биде сигурен дека нема да му се лизне од рака. Nokia не прецизираше кое заштитно стакло го штити екранот, но знаеме дека C12 има IP52 заштита од вода и прашина. Производителот ветува двегодишни квартални безбедносни „закрпи“, но не беше спомната надградба на оперативниот систем, што е вообичаено за телефоните со Android Go.
C12 е еден од помалите уреди во гамата на Nokia, со дијагонала на екранот од 6,3 инчи, димензии од 160,6 x 74,3 x 8,75 mm и тежина од 177 грама. Дисплејот со резолуција од 720 x 1.600 пиксели нема никого да импресионира, но е целосно во согласност со бараната цена и останатите спецификации. Во горниот дел од екранот има засек во форма на солза, додека на дното има прилично голема „брада“ според денешните стандарди.
Чипсетот Unisoc SC9863A, со осум јадра (1,6 GHz) и IMG8322 графика, е задолжен за секојдневните задачи. Не е реално да се очекува дека овој процесор може да исполни понапорни задачи, па се додека очекувањата се засноваат на најосновните функции, клиентите не треба да имаат проблеми. C12 доаѓа во конфигурација со 64 GB внатрешна меморија, но не може да се прошири со microSD картичка. Има и 2GB RAM, што е доволно за надградба на Android 13 Go верзијата на оперативниот систем, за која Google ги зголеми минималните барања, доколку Nokia некогаш се премисли.
Не треба да очекувате премногу ни од камерите на овој паметен телефон. Може да ви се најдат само ако навистина треба да фотографирате нешто или за видеоповици. Има само еден сензор од 8 MP на задната страна, а за селфиња е задолжена предната камера од 5 MP.
Меѓу другите спецификации, има батерија од 3.000 mAh, која се полни на 5 W, само еден звучник и поддршка за GPS навигација. Дополнително, Nokia C12 не е уред со 5G, наместо тоа, клиентите ќе треба да се потпрат на 4G. Други опции за поврзување вклучуваат Wi-Fi b/g/n и Bluetooth 5.2. Иако е за пофалба што конекторот од 3,5 милиметри не е отстранет, навистина нема оправдување за избор на Micro USB порта на дното.
За кого е наменет овој телефон? Одговорот е јасен - оние на кои им се потребни само најосновните работи за комуникација и полесно консумирање на видео и музички содржини. Може да биде одличен избор за стари лица, како деловен уред, но и како резервен телефон. Доаѓа во сина, зелена и кафена боја, а секој што сака да го купи C12 ќе може да го направи тоа за 120 евра - моментално само во Австрија и Германија, но се очекува проширување и на други пазари.