Странците треба да можат побрзо да добијат германско државјанство, но под одредени услови. Бундестагот вчера го прифати соодветниот предлог-закон.
Германскиот парламент (Бундестаг) вчера прифати реформа со која владата сака да овозможи побрзо стекнување на германско државјанство под одредени услови. Еве ги главните точки на прифатениот закон:
Странците кои сакаат германско државјанство во моментов можат да го добијат најрано по 8 години легален престој во земјата. Тој период треба да се скрати на 5 години, а во случај на „посебни достигнувања во интеграцијата“ на 3 години. „Постигнувања“ значат, на пример, добро познавање на германскиот јазик, доброволно општествено ангажирање или многу добри резултати на училиште или на работното место.
Мигрантите во принцип треба да можат да имаат двојно државјанство во иднина. Досега, апликантите за германски пасош прво мораа да се откажат од претходното државјанство. Ова не важи за граѓаните на другите членки на ЕУ и на Швајцарија, кои веќе можат да имаат две државјанства.
Сојузната влада верува дека многу луѓе се двоумеле да аплицираат за германски пасош затоа што, со откажувањето од постојното државјанство, се плашеле дека ќе ги загубат врските со нивната татковина или со семејството што сѐ уште живее таму.
Децата на странски родители, родени во Германија, во иднина би требало безусловно да добиваат германско државјанство доколку барем еден родител легално живеел во Германија повеќе од 5 години. Во моментов тој рок е 8 години. Во принцип, децата родени во Германија треба да им донесат и германско и државјанство на нивните родители и можат трајно да ги задржат и двете.
Побрзото стекнување државјанство треба да продолжи да се поврзува со исполнување на неколку услови. Странците кои сакаат да добијат германски пасош мора да достават докази за добра интеграција и добри јазични вештини. Исклучоците важат само за членовите на семејството, т.н. генерација гастарбајтери кои со децении живеат во Германија. Тие не мора да полагаат тест за државјанство и тест за германски јазик.
Услов за добивање државјанство е способноста на мигрантите да ги сносат трошоците за својот живот во Германија, како и трошоците за издржување на членовите на семејството. Гастарбајтери кои дошле во Германија по 1947 година, како и поранешни т.н. „договорни работници“ од ГДР.
За да добијат германски пасош, странските државјани, како и досега, мора експлицитно да се изјаснат дека го почитуваат слободарско-демократскиот основен поредок содржан во Уставот. Во Предлог-законот се наведува дека „антисемитските и расистички дејствија, како и оние насочени против родовата или сексуалната ориентација или други дејствија мотивирани од презир кон луѓето“ не се во согласност со уставно гарантираната заштита на човековото достоинство.
Според плановите на Владата, оваа декларација треба да се прошири во иднина. Заднината на ова се, меѓу другото, делумно антисемитските протести на улиците на Германија по нападот на терористичката милиција Хамас врз Израел. Така, во иднина, апликантите за германско државјанство би морале експлицитно да ја поддржат „специјалната историска одговорност на Германија за националсоцијалистичкото владеење на неправдата и неговите последици, особено за заштитата на еврејскиот живот“. Поради рускиот напад на Украина, ќе има посебно предупредување за „забрана за водење агресивна војна“. Однесувањето спротивно на овие барања би требало да го оневозможи добивањето германско државјанство.
На лицата кои потекнуваат од странство може да им се одземе германскиот пасош во рок од 10 години, на пример поради груба измама или давање лажни информации. Реформата предвидува и одземање на државјанството во случај на лажна изјава за поддршка на слободарско-демократскиот уставен поредок.
Новиот закон би можел да стапи на сила веќе во април. Според информациите од МВР, во Германија во моментов живеат околу 12 милиони странски државјани, од кои околу 5,3 милиони престојуваат во земјата најмалку 10 години.
Бундестагот усвои овој четврток, на 18 јануари, закон со кој треба да се поедностави депортацијата на одбиените баратели на азил и илегалните мигранти. Со овој закон, на пример, се укинува обврската на државните органи да објавуваат депортација. Исклучок се семејствата со деца под 12 години. Исто така, приговор или жалба против одлуката за забрана на престој во Германија повеќе не го одложува извршувањето.
Според информациите на Сојузното Министерство за внатрешни работи, во декември во Германија се регистрирани 242.642 лица кои загубиле право на престој во земјата. Сепак, 193.972 од нив добиле т.н. Duldung, односно привремено право на престој.