Најмалку пет лица загинаа синоќа кога големо парче алпски глечер се откина и удри во група планинари на популарна патека во Италија. Моментот кога ледената маса се урива по падините на Мармолада е снимен и од камери.
На социјалните мрежи се објавени видеа на кои се гледа ледена лавина, односно глечер како се урива по падините на највисоката планина (Мармолада) во северните италијански Алпи.
Како резултат на тоа, најмалку пет лица загинаа, службите за итни случаи соопштија дека во падот се повредени уште осум лица, а две лица се здобиле со тешки телесни повреди.
Нагласено е дека смртните случаи настанале поради тоа што глечерот се откинал токму на делот од патот што вообичаено се користи за да се стигне до врвот Мармолада, кој се издига до 3.300 метри и е највисокиот врв на источните Доломити.
Спасувачите со хеликоптери и десетици лица од итната помош помагаа во спасувањето на самото место на немилиот настан.
Сè уште не е познато што предизвикало отцепување на дел од мразот, но интензивниот топлотен бран што ја зафати Италија од крајот на јуни може да биде фактор, изјави Валтер Милан, портпарол на Алпската спасувачка служба, за државната телевизија RAI.
