Кога минатата година фотографот Зигфрид Модола го овековечи ритуалното обрежување млади девојки во Баринга, рурална област во Кенија, и британскиот Daily Mail објави сторија за маките на младите припаднички на племето Покот, светот беше ужаснат.
Против овој обичај се кренаа бројни организации за заштита на човековите права и правата на жените, но оваа традиција и натаму опстанува - иако во Кенија обрежувањето забрането е со закон.
Припадниците на ова племе објаснуваат дека тоа е начин за девојките да се подготват за брак и да се „разубават“. Дури ни најгрижливите родители не отстапуваат од ритуалот, и покрај фактот што девојките минуваат низ толку болна процедура што повеќето од нив губат свест.
„Тоа се прави отсекогаш, тоа е начин за девојките да влезат во светот на возрасните“, вели татко на една од девојките.
Овој вид на обрежување подразбира отстранување на клиторисот и дел од внатрешноста на вагината со цел да се намали желбата за секс, а се изведува со различни видови сечила - од стакло до ножеви.
Кениските закони предвидуваат доживотна робија за сите оние што ќе обрежат девојка која потоа ќе почине поради хеморагија, шок или подоцна за време на породување.
До ноември минатата година спроведена била истрага за 50 случаи на смрт на девојки при обрежување. Оние што ќе преживеат неретко покасно во животот - при пораѓање - доживуваат различни компликации.
Властите и судиите што се борат соодветно да ги казнат сите оние што продолжуваат со овој обичај истакнуваат дека се големи оптимисти кога станува збор за неговото прекинување.
„Можеби не утре, но ќе го прекинеме“, вели Кристин Нанџала, која стои на чело на телото што ги води истрагите. „Без надеж немаме ништо“.
