Кристијано Роналдо го постигна својот прв гол сезонава и прв во Лига Европа, кога реализираше пенал за Манчестер Јунајтед во 39. минута од натпреварот кај молдавски Шериф, во 2.коло од групата Е во Лига Европа.
До полувремето веќе беше 2:0, откако пред него погоди Џејдон Санчо и со тој резултат заврши натпреварот.
Многу медиуми го издвоија моментот од тој натпревар кој се случи кога играчите се упатија кон соблекувалната на пауза на полувремето. Камерите го следеа Роналдо и го фатија моментот кога обожаавателка, вработена во лекарскиот тим на стадионот Зимбру се обиде да побара од Роналдо заедничка фотографија.
Португалецот ја одби без воопшто да ја погледне. Тој само ја испружи раката во нејзина насока и ѝ даде до знаење дека не е расположен.
Корисниците на социјалните мрежи веднаш го осудија ваквото однесување на ѕвездата, со коментари дека ова е „ново дно“ во непочитувањето на фановите. Секако, имаше споредби со неговиот ривал Лионел Меси, кој важи за фудбалер кој секогаш е коректен со обожавателите.