Советот на Општина Битола ќе обесштети 127 лица од Битола и населените места Добромири, Кукуречани и Лопатица, во чии домови беа регистрирани штети од поројниот дожд и поплавата што во тој град се случи на 4 јули оваа година.
Комисија за проценка на штети од природни непогоди во Општина Битола утврди 139 барања и одлучи позитивно да одговори на 127 барања за кои од локалниот буџет ќе бидат издвоени 968.752 денари.
Како што е познато, делови од градското подрачје на Општина Битола на 4 јули оваа година беа зафатени од силно невреме проследено со обилни врнежи од пороен дожд и град кои предизвикаа поплави во одредени семејни домови и други објекти во градското подрачје во Битола. Комисија, врз основа на Елаборат изготвен согласно Одлука за единствена методологија за проценка на штети предизвикани од елементарна непогода остварила посети на терен и одлучи да бидат доделени близу еден милион денари за 127 лица кои ќе добијат различни парични суми за надомест на штета кои се движат од минимални 2.000 денари до максимални 31.500 денари.
