Статуата на легендарниот американски кошаркар и поранешна ѕвезда на Лос Анџелес Лејкерс Коби Брајант беше откриена синоќа за време на церемонијата пред арената Crypto.com.
Пред четири години, пензионираниот 41-годишен Брајант загина во хеликоптерска несреќа заедно со неговата ќерка Џиана, шестмина патници и пилотот.
Скулптурата, дело на скулпторката Џули Ротблат Амрани, го прикажува Коби со показалецот од десната рака насочен кон небото, моментот кога го напушти теренот во јануари 2006 година, откако постигна рекордни 81 поен против Торонто.
На церемонијата присуствуваа неговата сопруга Ванеса, сопственичката на ЛА Лејкерс, Џини Бус, легендата на НБА, Карим Абдул-Џабар и неговиот поранешен тренер Фил Џексон.
„Ова не е само за Коби, туку и за сите вас кои го поддржувавте низ годините“, рече сопругата Ванеса за време на церемонијата.
Да потсетиме, Брајант во текот на кариерата петпати беше шампион во НБА и тоа секојпат со ЛА Лејкерс, каде ја помина целата своја кариера.
Двапати беше прогласуван за најкорисен играч на финалната серија, а на НБА Ол-стар натпреварите се појави 18 пати и освои два олимписки златни медали.
