Дванаесет земји-членки на Европската Унија постигнаа договор околу критериумите според кои ќе се издаваат таканаречените ковид-пасоши, кои во време на пендемија ќе го олеснат протокот на туристи на Стариот континент.
Денеска на состанокот во Виена договор падна помеѓу Австрија, Германија, Грција, Данска, Италија, Кипар, Малта, Португалија, Словенија, Франција, Хрватска и Шпанија околу ковид-пасошите.
„Нашата цел е 'зелениот-пасош' брзо, и по можност, во еден единствен облик да се применива на ниво на ЕУ“, изјави за APA австриската министерка за туризам, Елизабет Кестингер.
Според неа, се работи за прашање за опстанокот на европскиот туризам.
„'Зелениот пасош' преку QR код веднаш ги дава информациите околу тоа дали сопственикот е вакциниран, тестиран или го прележал коронавирусот. Со тоа е овозможена едноставна и практична примена на подрачјето на ЕУ. Од чекирање на аеродромите до посети на селските гостилници“, додава Кестингер.
Нагласи и дека, во секој случај, целта на овој вид на документ не е да се изврши притисок врз народот за да се вакцинира.
Осетливите здрваствени податоци на носителите на ковид-пасоши, воедно, би останале во земјата од каде што е индивидуата и не би се споделувале на централно ниво во ЕУ.
Листата на критериуми е предадена на контрола во Европската комисија, која во наредните денови треба да донесе одлука околу нејзината примена.
Наредниот чекор ќе биде усогласување на примената на ковид-пасошите во трети земји.